Barnaráðstevna í NLH – 19. mars 2025
"Vaiana, Maui og ferðin út í ókenda"
Góðu børn, góðu vaksin!
Hava tit hoyrt um Vaianu og Maui?
Vaiana er djørv, klók og fylgir hjartanum. Maui er sterkur, eitt sindur stoltur – men eisini ein góður vinur, tá tað veruliga ræður um. Saman hava tey longu verið á stórum ævintýrum.
Men í Vaiana 2 hendir nakað nýtt: Vaiana hoyrir eina rødd, sum kallar á hana. Hennara forfedrar senda henni ein boðskap – hon má sigla longur, heilt út, har eingin hevur verið fyrr!
Men hon klárar tað ikki einsamøll. Hon hevur brúk fyri hjálp. Og tíbetur er Maui har! Hann er eitt sindur stuttligur, eitt sindur reypandi, men hann er eisini óførur og vil fegin hjálpa.
So saman fara tey út á eina nýggja, spennandi ferð – við einum toymi av djarvum sjófararum. Tey skulu finna svar. Tey skulu lurta eftir hvørjum øðrum. Tey skulu taka hond um hvønn annan. Og tey skulu finna vegin til eina betri framtíð fyri alt sítt fólk.
Og vita tit hvat? Í dag eru tit eisini ein partur av júst slíkari ferð!
Vit, tey vaksnu, vilja fegin vita: Hvussu sær eitt gott barnalív út? Hvussu skal ein familja vera? Hvat ger ein dag í barnagarðinum stuttligan? Hvat dámar tykkum best at gera, tá tit hava frí?
Líkasum Vaiana og Maui skulu tit í dag hjálpa okkum at finna svarini. Vit klára tað ikki uttan tykkum! Vit skulu lurta eftir tykkum, tí tað eru tit, sum best vita, hvat skal til fyri at hava eitt gott barnalív.
Og tað, sum tit siga í dag, verður ikki gloymt. Orðini, sum tit deila, verða ein partur av Føroya fyrstu barnalóg. Tað merkir, at tit hjálpa øllum børnum – ikki bara tykkum sjálvum, men eisini øllum teimum, sum vaksa upp aftaná tykkum.
So takk fyri, at tit eru her. Takk fyri, at tit vilja siga okkum tykkara tankar. Og takk fyri, at tit eru við á hesi stóru ferð.
Tí sum Vaiana og Maui lærdu okkum: Tá vit lurta eftir hvørjum øðrum – og hjálpa hvørjum øðrum – so finna vit vegin til eina betri framtíð!